Навоий шаҳрида вилоятнинг барча туманларидан келган фермер ва тадбиркорлар учун чорвачилик йўналишидаги уч кунлик махсус семинар-тренинглар ўз ишини бошлади. Жорий йилнинг 1 июнидан старт олган ушбу машғулотлар соҳада халқаро стандартларни жорий этиш ва маҳаллий ишлаб чиқарувчиларнинг профессионал малакасини оширишга қаратилган тизимли жараённинг мантиқий давоми ҳисобланади.
Маълумот ўрнида таъкидлаш жоизки, мамлакатимизнинг Жиззах, Сирдарё, Наманган, Фарғона, Қашқадарё ва Сурхондарё вилоятларида муваффақиятли ўтказилган ўқув курслари эндиликда Навоий воҳасида ташкил этилмоқда. Ушбу ташаббус Чорвачилик ва яйлов хўжалигини ривожлантириш агентлиги ҳамда Франция тараққиёт агентлиги (ФТА) иштирокидаги «Чорвачилик соҳасини барқарор ривожлантиришни молиялаштириш» дастури доирасида ҳаётга татбиқ этилмоқда. Франция тараққиёт агентлиги билан ҳамкорликдаги ушбу кенг кўламли дастур нафақат соҳага имтиёзли молиявий воситаларни жалб этиш, балки соҳа вакилларига замонавий назарий ва амалий билимларни етказиш орқали барқарор ривожланишни таъминлашни мақсад қилган.
Уч кун давом этадиган машғулотлар давомида соҳа мутахассислари, малакали профессор-ўқитувчилар ва илмий ходимлар иштирокчиларга чорвачиликнинг энг муҳим жиҳатлари юзасидан батафсил маълумот берадилар. Хусусан, гўшт ва сут йўналишидаги қорамолларни илмий асосланган ҳолда озиқлантириш, ветеринария гигиенаси талабларига риоя қилиш, юқумли касалликларнинг олдини олиш ҳамда соғиш жараёнларида замонавий технологияларни қўллаш масалалари атрофлича муҳокама қилинмоқда. Шу билан бирга, Навоий вилоятининг ўзига хос иқлим шароитидан келиб чиқиб, иссиқ ҳаво муҳитида ҳайвонларни сақлаш ва маҳсулдорликни камайтирмаслик усулларига алоҳида урғу берилмоқда.
Ўқув дастури назарий билимлар билан чекланиб қолмасдан, уларни амалиёт билан узвий боғлаш тамойили асосида ташкил этилган. Семинарнинг сўнгги қисмида иштирокчилар вилоятнинг етакчи чорвачилик хўжаликларидан бирига ташриф буюришлари кўзда тутилган. Ташриф давомида фермерлар замонавий технология ва ускуналарнинг иш жараёнини яқиндан кузатиб, соҳа мутахассислари билан тажриба алмашадилар ҳамда семинарда ўзлаштирилган билимларни амалиётда мустаҳкамлайдилар.
