Mamlakatimizda chorvachilik sohasini yangi bosqichga olib chiqish va soha vakillarining professional ko‘nikmalarini mustahkamlashga qaratilgan tizimli tashabbus o‘zining navbatdagi manziliga yetib keldi. Jizzax, Sirdaryo, Namangan, Farg‘ona va Qashqadaryo viloyatlaridagi muvaffaqiyatli tajribalardan so‘ng, navbatdagi intensiv o‘quv kurslariga voha markazi – Termiz shahri mezbonlik qilmoqda. 2026 yilning 23, 25 va 26 may kunlari Surxondaryo viloyatining barcha tumanlaridan kelgan fermer va tadbirkorlar uchun maxsus tashkil etilgan ushbu mashg‘ulotlar sohadagi ilg‘or tajribalarni amaliyotga izchil joriy etishga xizmat qiladi.
Mazkur loyiha O‘zbekiston Respublikasi Veterinariya va chorvachilikni rivojlantirish qo‘mitasi hamda Fransiya taraqqiyot agentligi (FTA) ishtirokidagi «Chorvachilik sohasini barqaror rivojlantirishni moliyalashtirish» dasturi doirasida hayotga tatbiq etilmoqda. Ushbu dastur nafaqat moliyaviy ko‘mak va grantlar ajratish, balki soha vakillarining nazariy bilim va amaliy ko‘nikmalarini doimiy ravishda oshirib borishni maqsad qilgan.
Uch kunlik o‘quv dasturi doirasida ishtirokchilar chorvachilik va veterinariya sohasining eng dolzarb masalalari bilan tanishmoqdalar. Malakali professor-o‘qituvchilar va ilmiy xodimlar rahbarligida o‘tayotgan mashg‘ulotlarda chorva mollarini to‘g‘ri oziqlantirish, veterinariya gigiyenasi, kasalliklarning oldini olish va sog‘ishning zamonaviy texnologiyalari o‘rgatilmoqda. Ma’ruzalar faqatgina nazariya bilan cheklanib qolmay, balki janubiy iqlim sharoitida chorva mahsuldorligini oshirishning amaliy usullariga yo‘naltirilgan.
O‘quv kunlarining yakuniy bosqichi an’anaviy tarzda amaliy shaklda o‘tkazilib, ishtirokchilar viloyatdagi ilg‘or chorvachilik xo‘jaliklaridan biriga tashrif buyurishi rejalashtirilgan. Bu yerda fermerlar nazariy bilimlarini real ish jarayonida sinab ko‘rish, zamonaviy texnologiyalarning ishlash tizimi bilan tanishish va o‘zaro tajriba almashish imkoniyatiga ega bo‘ladilar.
