Аввал хабар берганимиздек, Хоразм вилоятида чорвачилик соҳаси вакиллари учун халқаро стандартлар асосида ташкил этилган интенсив ўқув семинар-тренинглари ўз ниҳоясига етди. Чорвачилик ва яйлов хўжалигини ривожлантириш агентлиги ҳамда Франция тараққиёт агентлиги (ФТА) иштирокидаги «Чорвачилик соҳасини барқарор ривожлантиришни молиялаштириш» дастури доирасида ўтказилган ушбу тадбир вилоят чорвадорлари учун катта тажриба мактаби бўлди.
Ўқув курсининг якуний босқичи Янгибозор туманидаги «OS NASL – CHORVASI» фермер хўжалиги чорвачилик фермасида амалий машғулот шаклида ўтказилди. Иштирокчилар назарий билимларни бевосита амалиётда қўллаш, замонавий технологиялар ва ҳайвонларни парваришлашнинг илғор усуллари билан яқиндан танишиш имкониятига эга бўлдилар. Тренинг якунида қатнашчилар ўз таассуротлари ва орттирган билимлари ҳақида ўртоқлашдилар.
«Бу каби тренинглар биз каби фермерлар учун жуда керак,» — дейди тадбир иштирокчиларидан бири. — «Илгари ҳайвонларни парваришлашда айрим жиҳатларга эътибор бермас эканмиз. Эндиликда соғиш гигиенаси ва касалликларни эрта аниқлаш бўйича олган билимларимизни ўз хўжалигимизда албатта қўллаймиз».
Бошқа бир қатнашчи Франция тараққиёт агентлигининг молиявий кўмаги ҳамда соҳадаги замонавий ёндашувлар чорвачилик тармоғини ривожлантириш учун муҳим асос бўлишини қайд этди.
Эслатиб ўтамиз, мазкур лойиҳа чорвачилик тармоғини модернизация қилиш ва маҳаллий маҳсулотларнинг рақобатбардошлигини оширишга қаратилган.
