Nazariyadan amaliyotga: qashqadaryolik fermerlar uchun “SARDOR SH” fermer xo‘jaligida amaliy mashg‘ulotlar o‘tkazildi

Avval xabar berilganidek, joriy yilning 20–22 may kunlari Qashqadaryo viloyatida chorvachilik sohasida faoliyat yuritayotgan fermerlar uchun intensiv o‘quv kurslari tashkil etilgan edi. Mazkur tadbirning nazariy qismi muvaffaqiyatli yakunlanib, asosiy e’tibor bilimlarni bevosita ish jarayonida qo‘llashga, ya’ni amaliy bosqichga qaratildi. Navbatdagi o‘quv mashg‘ulotlari Qarshi tumanidagi “SARDOR SH” chorvachilikka ixtisoslashgan fermer xo‘jaligi bazasida o‘tkazildi.

Veterinariya va chorvachilikni rivojlantirish qo‘mitasi hamda Fransiya taraqqiyot agentligi ishtirokidagi loyiha doirasida o‘tkazilayotgan ushbu amaliy darslar sohaga xalqaro standartlarni joriy etishni ko‘zda tutadi. Ishtirokchilar fermer xo‘jaligi sharoitida qishloq xo‘jaligi hayvonlarini to‘g‘ri parvarishlash va me’yor asosida oziqlantirish usullarini yaqindan o‘rgandilar. Sut va go‘sht yo‘nalishidagi qoramollarning rasionini to‘g‘ri shakllantirish hamda mahsuldorlikni oshirish masalalari mutaxassislar tomonidan atroflicha tushuntirib berildi.

Mashg‘ulotlar davomida sog‘ish jarayonlarini samarali tashkil etish va sog‘ish gigiyenasiga amal qilish bo‘yicha ko‘nikmalar namoyish etildi. Chorvachilikka ixtisoslashgan fermer xo‘jaliklari mutaxassislari veterinariya va bioxavfsizlik choralarini amaliyotda qo‘llash tartibi bilan tanishdilar. Hayvonlar salomatligini muhofaza qilishda kasalliklarni erta aniqlash va profilaktika ishlarini to‘g‘ri yo‘lga qo‘yish tadbirning muhim mavzularidan biriga aylandi.

Fermerlar kutilmagan vaziyatlarda hayvonlarga birinchi yordam ko‘rsatish va shoshilinch parvarishlash usullarini amalda sinab ko‘rdilar. Tajribali olimlar va soha mutaxassislari tomonidan berilgan tavsiyalar xo‘jaliklarda ish unumdorligini oshirishga xizmat qiladi. Nazariya va amaliyotning bunday uyg‘unligi ishtirokchilarga o‘z faoliyatlarida zamonaviy texnologiyalardan samarali foydalanish imkonini beradi.