Jizzax viloyatida chorvachilik tarmog‘ining bugungi holati hamda Fransiya taraqqiyot agentligi (FTA) bilan hamkorlikda amalga oshirilayotgan loyihalarga bag‘ishlangan matbuot anjumani bo‘lib o‘tdi.
Tadbir davomida sohani zamonaviy texnologiyalar asosida modernizatsiya qilish, mahsulot yetishtirish hajmini oshirish va ilg‘or tajribalarni tatbiq etish masalalari ko‘rib chiqildi. Shuningdek, viloyat hokimi Ulug‘bek Mustafoyevning mazkur sohani qo‘llab-quvvatlash hamda uning barqaror rivojlanishini ta’minlashga qaratilgan tashabbuslariga alohida e’tibor qaratildi.
Tadbir ishtirokchilari xorijiy investitsiyalarni jalb etishning strategik ahamiyatini, amalga oshirilayotgan loyihalarning aholi uchun yangi ish o‘rinlari yaratish hamda hududning eksport salohiyatini sezilarli darajada kengaytirishdagi o‘rnini alohida ta’kidladilar. Shuningdek, fermerlar uchun o‘z faoliyatida innovatsion yechimlarni o‘zlashtirish borasida ochilayotgan keng imkoniyatlar ko‘rib chiqildi. Anjuman davomida investitsiya muhitini yanada takomillashtirish va mahalliy ishlab chiqarishga jahonning ilg‘or tajribalarini integratsiya qilish masalalari yuzasidan qizg‘in fikr almashildi.
Dasturning amaliy qismi doirasida Sharof Rashidov tumanidagi “Chaqmoq” fermer xo‘jaligiga tashrif buyurildi. Mazkur xo‘jalik chorvachilikning kundalik jarayonlariga yuqori texnologiyalarni muvaffaqiyatli va samarali joriy etishning namunasi sifatida ko‘rsatildi.
Bunday yondashuv sohani rivojlantirish nafaqat iqtisodiy yuksalish omili, balki hududlarda ijtimoiy barqarorlikni ta’minlash va aholi bandligini oshirishning muhim vositasi sifatida baholanmoqda.
Manba
