2026 йил 2 июль куни Нукус шаҳрида “Чорвачилик соҳасини барқарор ривожлантиришни молиялаштириш” лойиҳаси доирасида ҳудудий амалий семинар ўтказилди. Мазкур тадбир Чорвачилик ва яйлов хўжалигини ривожлантириш агентлиги ҳамда Франция тараққиёт агентлиги (ФТА) кўмагида, Лойиҳани амалга ошириш гуруҳи, Фермерлар кенгаши ва ҳамкор банклар вакиллари иштирокида ташкил этилди.
Cеминарнинг асосий мақсади Қорақалпоғистон Республикасидаги чорвадор фермерларнинг молиялаштириш ва имтиёзли кредитлар олиш имкониятлари тўғрисидаги хабардорлигини оширишдан иборат бўлди. Семинар давомида иштирокчилар грант ва кредит аризаларини мустақил ва тўғри тайёрлаш бўйича амалий кўникмаларини ривожлантирдилар ҳамда ҳамкор тижорат банклари ва соҳавий уюшмалар вакиллари билан ўзаро манфаатли ҳамкорлик алоқаларини йўлга қўйдилар.
Семинар дастуридан бир нечта интерфаол ва амалий сессиялар ҳам ўрин олди. Дастлаб мутахассислар мавжуд молиявий воситалар, қарз олувчиларга қўйиладиган талаблар ва ариза топшириш жараёнида йўл қўйиладиган одатий хатолар таҳлилини тақдим этдилар. Шунингдек, илгари ушбу лойиҳа кўмагида молиялаштиришни жалб этиб, ўз хўжалигини ривожлантирган фермерлар эришилган натижалар ва реал иқтисодий самарадорлик борасидаги ўз тажрибалари билан ўртоқлашдилар.
Тадбирнинг энг муҳим қисми амалий машғулотга йўналтирилган бўлиб, унда иштирокчилар мутахассислар билан биргаликда лойиҳа концепциясининг намунасини ишлаб чиқиш, аризанинг асосий тузилмасини тайёрлаш ва дастлабки молиявий ҳисоб-китобларни амалга оширишни ўргандилар. Ишлаб чиқилган лойиҳа тақдимотлари ҳамкор банклар вакиллари томонидан эксперт баҳосидан ўтказилди ва уларни янада такомиллаштириш бўйича зарур тавсиялар берилди.
Семинар якунида ташкилотчилар томонидан иштирокчилар учун кейинги босқичлар, ариза топшириш тартиби тушунтирилди ва тегишли алоқа маълумотлари тақдим этилди.
