Андижонлик фермерлар учун молиявий имкониятлар ва грантлар ажратиш бўйича амалий семинар ўтказилди

Жорий йилнинг 13 июль куни Андижон шаҳрида «Чорвачилик соҳасини барқарор ривожлантиришни молиялаштириш» лойиҳаси доирасида ҳудудий амалий семинар бўлиб ўтди. Лойиҳа Чорвачилик ва яйлов хўжалигини ривожлантириш агентлиги ҳамда Франция тараққиёт агентлиги (ФТА) кўмагида амалга оширилмоқда.

Семинардан кўзланган асосий мақсад маҳаллий фермер ва тадбиркорларнинг мавжуд молиялаштириш имкониятлари тўғрисидаги хабардорлигини ошириш, имтиёзли кредит ва грантлар олиш учун аризаларни тўғри тайёрлаш бўйича амалий кўникмаларини ривожлантириш ҳамда ҳамкор банклар ва соҳавий уюшмалар билан ўзаро ҳамкорликни мустаҳкамлашдан иборат бўлди.

Семинар дастури тўлиқ амалий аҳамиятга эга бўлиб, унда соҳа мутахассислари, Фермерлар кенгаши ва ҳамкор банклар вакиллари иштирокчиларга қуйидаги йўналишларда батафсил маълумот бердилар:

• лойиҳа доирасида тақдим этилаётган молиявий воситалар ва грант имкониятлари;
• қарз олувчиларга қўйиладиган асосий талаблар ва лойиҳаларни танлаб олиш мезонлари;
• ҳужжат топшириш ва аризаларни тўлдиришда энг кўп йўл қўйиладиган одатий хатолар.

Бундан ташқари, тадбирда лойиҳадан аллақачон муваффақиятли фойдаланиб келаётган бенефициар фермерлар иштирок этиб, ўзларининг амалий тажрибалари, маблағларни жалб қилиш жараёнида юзага келган қийинчиликлар ва уларни бартараф этиш йўллари билан ўртоқлашдилар.

Семинарнинг иккинчи ярмида иштирокчилар учун махсус амалий машғулот ташкил этилди. Унда фермерлар экспертлар кўмагида ўз лойиҳалари концепциясини ишлаб чиқиш, аризанинг асосий тузилмасини тайёрлаш ва дастлабки молиявий ҳисоб-китобларни амалга оширишни ўргандилар. Якуний босқичда ишчи гуруҳлар томонидан тайёрланган лойиҳалар тақдимоти ўтказилди. Ушбу лойиҳалар ҳамкор банклар вакиллари томонидан экспертлик назари билан баҳоланиб, уларни янада такомиллаштириш бўйича зарур тавсиялар берилди.

Бўлиб ўтган ушбу амалий семинар Андижон вилоятида чорвачилик йўналишида фаолият юритаётган тадбиркорлар учун ўз бизнесларини кенгайтириш ва замонавий молиявий кўмакларни жалб қилиш йўлида муҳим ва фойдали майдон бўлиб хизмат қилди.