“Чорвачилик соҳасини барқарор ривожлантиришни молиялаштириш” лойиҳаси доирасида Франция тараққиёт агентлиги (ФТА) иштирокида грант ажратиш механизми жорий этилмоқда. Ушбу ташаббус тадбиркорларнинг молиявий юкини камайтириш ҳамда тармоққа барқарор инвестицияларни жалб қилишни рағбатлантиришга қаратилган.
Грант ажратишнинг асосий шартлари
Грант субсидияси ажратиладиган кредит билан боғлиқ ҳолда тақдим этилади ва лойиҳа кўрсаткичларига қараб белгиланади:
- субсидия миқдори — кредит суммасининг 40 фоизигача;
- кредитнинг энг юқори миқдори — 100 минг еврогача;
- дастурнинг амал қилиш муддати — 2028 йил 31 мартгача;
- грант миқдори — тадбиркорнинг лойиҳадаги шахсий улушига боғлиқ.
Мазкур маблағлар чорвачиликни ривожлантириш, жумладан, ускуналар харид қилиш, ишлаб чиқаришни модернизация қилиш ва янги технологияларни жорий этишга йўналтирилиши мумкин.
Грантни кимлар олиши мумкин?
Қуйидаги субектлар грант олувчи бўлишлари мумкин:
- фермер ва деҳқон хўжаликлари;
- яккатартибдаги тадбиркорлар;
- оилавий корхоналар;
- қишлоқ хўжалиги кооперативлари ва МЧЖлар (белгиланган иштирок тартибига риоя қилинган ҳолда).
Кредитлар бўйича муддати ўтган қарздорликнинг мавжуд эмаслиги грант ажратишнинг мажбурий шарти ҳисобланади.
Грант олиш босқичлари
Грант кўмаги кредит олинганидан ва лойиҳа тўлиқ амалга оширилганидан сўнг тақдим этилади:
- кредит расмийлаштириш;
- кредит маблағлари ҳисобига зарур ускуналарни сотиб олиш ёки лойиҳани ишга тушириш;
- грант олиш учун ариза топшириш;
- лойиҳани ҳимоя қилиш;
- шартномани имзолаш;
- маблағларни олиш;
- ҳисобот топшириш ва лойиҳа ижросини назорат қилиш.
Дастурнинг афзалликлари
Грант механизми харажатларнинг бир қисмини қоплаш, пул оқимини яхшилаш ҳамда молиявий хатарларни камайтириш имконини беради. Ёш тадбиркорлар учун эса алоҳида қўшимча имтиёзлар кўзда тутилган. Шу тариқа, грант ва кредитнинг ўзаро мутаносиблиги чорвачилик сармоядорлари учун мустаҳкам молиявий пойдевор яратади.
